'दिल्लीचेही तख्त राखणारा, देशगौरवासाठी झिजणारा' अशी ओळख असलेल्या महाराष्ट्राने देशाला प्रत्येक क्षेत्रात अतुलनीय नररत्ने दिली आहेत. इतिहास साक्षी आहे जेव्हा जेव्हा देशाला गरज पडली तेव्हा तेव्हा महाराष्ट्र धावून आला. 'अशा सामर्थ्यवान महाराष्ट्राची ही ओळख आणि गौरव टिकून रहावा यासाठी इथले मनुष्यबळ वैचारिक, नैतिक, सांस्कृतिकदृष्ट्या प्रबळ असले पाहिजे' हा ध्यास घेऊन ...... रोजी शिवराज पाटील यांनी 'एक घास फाउंडेशन' ची स्थापना केली.

'प्रशासन' - लोकशाहीच्या चार स्तंभांपैकी एक. विधिमंडळाने पारित केलेले कायदे आणि धोरणे अमलात आणण्याचे, देशात कायदा व सुव्यवस्था राखण्याचे  महत्वाचे कार्य प्रशासन त्याच्या विविध शाखांद्वारे करते. देशाच्या प्रगतीत प्रशासनाचे महत्व ओळखून 'एक घास फाउंडेशन' महाराष्ट्रातील गावागावातून बुद्धिमान व सुसंस्कृत प्रशासकीय कर्मचारी तसेच अधिकारी बनवण्याच्या ध्येयाने अनेक उपक्रम राबवत आहे. त्यात प्रामुख्याने इ. पाचवीपासून पुढे एम.पी.एस.सी. / यु. पी. एस. सी., आय. ए. एस., आय. पी. एस. या प्रशासकीय परीक्षांची तयारी, बाल-संस्कार, युवा-संस्कार, कौटुंबिक समुपदेशन हे उपक्रम राबवले जात आहेत.

अतिशय महागड्या शिक्षणपद्धतीमुळे आणि महागड्या कोचिंग क्लासेस मुळे अनेक गरीब मुले-मुली युवा वर्ग बुद्धिमान असूनही प्रशासकीय अधिकारी होण्यापासून वंचित राहतो यासाठी महाराष्ट्रातील विविध शाळा, महाविद्यालयांमध्ये २२ वर्षांपासून अविरतपणे सुरु असलेल्या या उपक्रमाअंतर्गत आतापर्यंत ३५००+ विनामूल्य व्याख्याने दिली गेली आहेत. ज्याचा लाभ जवळपास ३,५०,००० गरीब, होतकरू व बुद्धिमान विद्यार्थ्यांनी घेतला आहे. यातील जवळपास ४५०हून अधिक विद्यार्थ्यांची प्रशासनातील वर्ग १, वर्ग २, वर्ग ३ कर्मचारी / अधिकारी पदांवर निवड झाली आहे.

१५ ऑगस्ट २०२१ रोजी मोशी प्राधिकरण (पुणे) येथून सुरु करण्यात आलेल्या 'चला महाराष्ट्र घडवूया एक घास फाउंडेशन' या क्रांतिकारी शैक्षणिक उपक्रमांना  आतापर्यंत पुणे, सातारा, सांगली, सोलापूर, कोल्हापूर, ठाणे, वसई व विरार येथून भरभरून प्रतिसाद मिळाला.

या उपक्रमांचे रूपांतर कुशल, बुद्धिमान, सुसंस्कृत पिढी घडवणाऱ्या एका विशाल प्रकल्पात व्हावे हे संस्थेचे उद्दिष्ट आहे. महाराष्ट्रातील गावागावांमध्ये आणि शहरातील स्वयंपूर्ण सोसायट्यांमध्ये ५व्या इयत्तेपासून प्रशासकीय स्पर्धा-परीक्षा मार्गदर्शन केंद्र, बालसंस्कार केंद्र, कौटुंबिक समुपदेशन केंद्र उभे करण्याचे आव्हानात्मक कार्य आम्ही 'एक घास' च्या माध्यमातून करायचा निर्णय घेतला आहे आणि मोशी प्राधिकरण सोसायटी, पुणे इथून त्याची सुरवातदेखील केली आहे.